'आई एम सरी' लाई एनसेलको सहयोग

पछिल्लो समयमा अंग्रेजी नामबाट नेपाली चलचित्रको नाम बन्ने क्रम बढ्दो छ । अंग्रेजी नाम राखेर निर्माण गरिएको चलचित्र मध्येको एक हो 'आई एम सरी' । चलचित्रलाई हरि महतको निर्माणमा दिनेश राउतले निर्देशन गरेका हुन् ।

छायाँकनको अन्तिम चरणमा पुगेको चलचित्र 'आई एम सरी' लाई दूरसंचार प्रदायक संस्था एनसेलले सहयोग गर्ने भएको छ । चलचित्रको प्रचारप्रसारमा एनसेलले ठूलै सहयोग गर्ने चलचित्रका निर्माता हरि महतले फिल्मीखबरलाई जानकारी दिए । निर्माता महतका अनुसार एनसेलले चलचित्रमा हात हालेको यो पहिलो पटक हो । यसैगरी सो चलचित्रलाई अग्नी सिमेन्ट र अल्फा सिमेन्टले पनि सहयोग गर्ने भएको छ । अब एनसेल, अग्नि सिनेन्ट र अल्फा सिमेन्टले कुन कुन कुरामा सहयोग गर्ने हो त्यो त हेर्न नै बाँकी छ तर अहिले भने राम्रो सहयोगको हात पाएको चलचित्र आई एम सरीलाई फिल्मीखबरको तर्फबाट हार्दिक बधाई !

पूर्णरूपमा प्रेम कथामा आधारित रहेर निर्माण गरिएको सो चलचित्रमा आर्यन सिक्देल, केकी अधिकारी, श्याम अर्याल, निता ढुङ्गाना, बिएस राणा, अन्जु श्रेष्ठ, बिशाल अधिकारी लगायतको अभिनय रहेको छ । ताराप्रकाश लिम्बुको संगीत रहेको सो चलचित्रमा प्रदिप भारद्वाजको लेखन तथा पुरूषोत्तम प्रधानको छायाँकन रहेको छ । चलचित्र आगामी असोज महिना भित्रमा सार्वजनिक गरिने निर्माण युनिटले जनाएको छ ।